Happy to Give Back su accion di donacion riba caya, un exito!

Oranjestad – Den fin di siman, un grupo di boluntario di CEDE Aruba a para na diferente rotonde cu e ‘Happy to Give Back Box’. Esaki ta en conexion cu e ‘Happy to Give Back Month’ durante e luna di augustus, pa recauda fondo pa nos comunidad den necesidad. Ta di remarka cu hopi automobilista a tuma nan tempo di para y duna local cu nan por, hacienda esaki un iniciativa exitoso.

Cu e campaña di Happy to Give Back, CEDE Aruba ta sostene 3 instancia local cu ta yuda personan den dificultad cu cuminda y otro producto essencial. Esaki nan ta, FPNC (banco di
cuminda nacional), Ban Uni Man Pa Cria Nos Muchanan (programa di desayuno pa muchanan na scol) y YMCA (programa di meals-on-wheels).

Durante henter luna di augustus, e accion di donacion lo continua na diferente rotonde rond di nos isla. Automobilistanan no lo por faya ‘Happy to Give Back Box’ door di su colornan yamativo, traha cu material duna pa Kooyman. E ‘Happy to Give Back Box’ tambe ta poni na diferenta localidad caminda tambe por haci donacion, manera, Gianni’s Group, Peanuts, Pizza Hut, Red Fish, The Kitchen Table, Así es mi Perú, Yemanja, Matthew’s, Dushi Bagels, Manchebo, Water’s Edge, The Kitchen, Suikertuin, Local Store, Muscles & Lungs, Kooyman, Paradera Gas Station, Aruba Happy Rentals, The Specialists, y Citgo San Nicolas.

Si ta prefera pa haci un donacion digital, por haci esaki via e servicio di SMS di Setar. Manda un SMS cu e palabra DUNA pa 222 y duna Afl. 1,- of SMS cu e palabra YUDA pa 250 y yuda cu Afl. 5,-. Tambe, por haci un donacion directamente riba e website: www.happytogiveback.com/donate/

Por ultimo, Happy to Give Back lo organisa su grandioso Radio-y Telethon Nacional pa 48 ora pa asina recauda mas fondo cu ta posibel. E 10 emisoranan mas grandi hunto cu TeleAruba lo participa. Bo organisacion lo kier participa? Manda un email pa [email protected] of tuma contacto cu Nathalie Rietman na 630 5451.